A ‘ddi tempi friddusi

A ‘ddi tempi friddusi e scuri jittau Cesari ‘nu bannu,
e li poviri e signuri tutti a scriviri si vannu.

Quannu Cesari jittau ‘ddu gran bannu riurusu,
San Giuseppi si truvava ‘nti la ciazza rispittusu.

San Giuseppi era cunfusu di purtarisi a Maria,
e lu tempu era scurusu, cci scurau ‘mmenzu a la via.

‘Nti ‘na urutta si firmaru San Giuseppi e la Maronna,
e li santi pellegrini ddocu rintra arripusaru.

Arrivannu a menzannotti, cci nasciu lu Bammineddu,
‘mmenzu o’ vuoi e ‘u sciccareddu cci nasciu Gesuzzu beddu.

C’era un poviru picuraru, n’avia nenti chi purtari,
porta latti ‘nti ‘na sisca, cosa ‘i cavaddu e tuma frisca.

C’era un poviru cacciaturi, n’avia nenti chi purtari,
porta un liepru e un cunigghiu ppi la matri e ppi lu figghiu.

C’era un poviru craunaru, n’avia nenti chi purtari,
porta ‘n cocciu di crauni ppi scaffari lu Signuri.