La Norma

Canzoni popolari Lombardia
Luciano Beretta

In temp de guerra a l’era ona sciora

E poeu lee l’ha pers la soa cà.

Gh’è mòrt el fioeu e mi ghe somigliavi

E inscì la m’ha semper adoraa.

‘Na nòtt sul ponte del cavalcavia

Tornando a cà dal cors Còmm,

L’hoo ritrovada al fanal de la via

A fa’l mestee per i òmm

Norma la Casta Diva di quatter pont

L’è voeunna di puttan de Porta Noeuva.

In di sò brasc a gh’è passaa mezz mond:

Garzon, student e militar de leva.

D’estaa, d’autunn, d’inverno e in primavera
Su e giò per el navili lee la batt

Cont on faccion bel ross de cioccatera

La gira tutt la nòtt compagn di gatt.

Gh’era ona margherita in mezz ai fior del praa.

A l’era profumada, a l’era de cattaa.

L’ortiga per l’invidia, la gh’ha streppaa el vestii.

Povera margherita, consciada inscì!

Cavej giall ‘m’el zaffran, cappell de pel,

La bocca ona sciavatta vermiglion

E i oeucc, e i oeucc che ciamen la pietà del ciel

E sòtt’al trucch nasconden el magon.

Andemm! L’è chì la Venere de Milo.

Andemm, gh’è sòtt al pont quel materass…

Stanòtt el Redefòss l’è mej del Nilo:

La luna la se speggia in santa pas.

Vola farfalla, vola! Vola de chì e de là,

Cont i tò al de seda cha paren pitturaa.

On dì te innamoravet i fiordalis e i ròs

Ma adess gh’è pù nessun che te guarda adòss.

Mi sont ona farfalla de la nòtt

Voeunna che gira sòtt in di fanaj

Gh’hoo minga i al su i spall, ma fa nagòtt,

Coi piatt i a giri e me fann mal i caj.

I a vedii de nòtt sti bej farfall

Che sòtt’al ciar di lamped de la strada

Giren che te inciocchissen de stà mal

E come lor, mì giri la risada

Succed che ona quaj voeunna on poo improdenta

La va visin al ciar, la scòtta i al

La borla giò, la moeur de mòrte lenta

E la po’ pù volà per el gran mal.

Nessun se accòrg che lee la vola pù

E i alter so compagn volen ‘me i matt.

Su i marciapee coi oeucc la guarda in su

E la finiss in bocca d’on quaj ratt.

…E tì, ratton, ven chì ancamò a trovamm.

Ti senza barba te see fòrt ‘me on òmm,

Te gh’heet el traver giust per el mé tramm…

Nò… ‘me te se ciamet ti? Ah, che bel nòmm…

Ciao Celestino! Nò, nò voeuri nient.

Nò, te ripeti nò, va ben inscì.

L’è cert che mì voo minga in falliment,

Del mio bel corpo son padrona mì.

Norma! Norma! Presente giovinòtti!

Ah! Ah, te see tì, ruffian di vacch scannaa!

Trentun servizi… sì, trentamila erotti!

Te see vegnuu ben prest per incassaa!

Andemm, va là ! L’è ‘vert el cantinon.

Hinn squasi i cinch, fra pòcch se alza el soo.

Gh’hoo i òss che vosen la disperazion,

Gh’hoo el mal de pee e me fa mal el coo.

‘Na grappa grigio-verde, scior Francesch!

Buonanotte! Voo a dormì col mè ruffian.

Che bon odor ne l’aria, de pan fresch…

Se sveglia la città con chji campann.

Povera Nòrma, povera mì!

Signor perdònom, l’è mej morì…