Ma intant ch’el gh’è

Musica di V. Pinotti

Amor amor nostran e spetta e spera,

te see mia finalment.

Se tègnom cunt l’età ben volentera

te faroo di compliment.

E quand saroo con nanca on dent in bocca,

col vosin del vegg resgioo

e col baston de lègn che in terra el tocca,

bei storiell te contaroo.

Andemm a fà l’amor con tenerezza

sòtt el lumm de l’abasgior,

rimediaroo de cert con ‘na carezza,

sì, ma minga tutti i or.

Ma intant ch’el gh’è

lassemell nò smorzà el foeugh d’amor

che cont el vent el cor

in sul taccoin del temp de gran premura,

vivemm in stoo moment la gran ventura.

On nonsochè

in abandon coi nòst penser anzios

e tant balòss e malizios.

el se moeuv dent coi smagn de la natura.

Con tant piesè

godemm stoo bell moment cont i virtù,

virtù de gioventù

che fann congiura anmò con la passion.

Oh brutt balòs d’on principe del fòro,

mazzasett del tribunal,

i dònn in sul mercaa disen in còro

che in amor te see fatal.

Ma car amor adess fà nò el fanfara,

o per arte o per mestee

t’hee conquistaa domà la portinara

senza titol ne danee.

Vegg tì e veggia mì, oh car Stemègna,

lassa pur ch’el mond el dis.

L’importa che l’amor el se mantègna

in del coeur cont i radis.