A ninna ninna a cantare

A cantare a sa fiotta.

Cann’ad’a esse sa trota

In sa terra forroganno.

Cann’ad’a esse bannanno

In aeras su molinu

E ad’a esse giardinu

Sa tanca ‘e Seusè

E ad’a esse su re

Su runcu ‘e Nortzà:

Tann’asa esser’ istrada

In su meu pensamentu.

Cann’ad’a esse su entu

Accorrau in un’ampudda

E ad’a esse sa pudda

A beste e a mucadore

E ad’a esse s’istore

A sembreru e a cabanu

E d’ant’a narre galanu

E d’ant’a cantare i gosos.

Cann’ant’a esser’isposos

Is alasse de Aratu

E ad’a esse su attu

Capitanu ‘e is soldaos

E ant’a esse giuraos

Is pivoneddos de nie.

Cann’ad ‘a esee sa die

Tres meses e duas horas.

Cann’ant’ a esse signoras

Is suergios de sa Rutta

E ant’a portare frutta

Is mattas de Marmureu

E ant’a portare seu

Su tope ei s’iscrissone.

Canno ad’a esse s’agnone

Che giuitu de cim ‘annos.

Cann’ant’a esser’is mannos

A guvernu de is pittios.

Cann’ant’a esse navios

Is baos de Tascusi.

Cann’ad’a esse Brebi

Cittade prus de Casteddu.

Canno su sole es nieddu.

Nieddu prus de sa mura.

Tanno tue ista segura

C’a tie m’apo a leare!

A ninna ninna a cantare

A ninna ninna a cantare.