El taxi

Te sbròffen de gott
stremíssen de brutt
quand sònen col clacson gut gut
te schí i tacch
te schiven col trucch
se volten te vósen tarlúcch

Su tram ‘mè i saracch
te pòdet no staggh
s’te voeut digh s’te voeut fagh s’te voeut dagh
col frècc in di oss
te restet lí stracch
coi gott che te gotten adoss

Ohi taxi brutt pilàtt
gotten i gott mi sont chí a spettàt
ne riva vun a quatter post
vinticinq zvanzigh e sèmm a post
e dài ch’el va el birocc
ma la nebbiètta la stoppa i oeucc
contra el lampión lú ‘l me fà patatracch
e mi voo a cà col nas tutt ròtt

S’te ciàppet el brumm
signor che macèll
sta attent, raccomandes la pèll
s’el ciappa on topicch
i roeud vann a tocch
se sètta per terra anca el brocch
s’te paghet el cost
vint franch l’è modest
ma invano te spèttet el rest
e intanta i minutt
sigútten a passà
ma ‘l taxi se ved no rivà

Ohi taxi brutt pilàtt
gotten i gott mi sont chí a spettàt
ne riva vun a quatter post
vinticinq zvanzigh e sèmm a post
e dài ch’el va el birocc
ma la nebbiètta la stoppa i oeucc
contra el lampión lú ‘l me fà patatracch
e mi voo a cà col nas spargnacch
tutt ròtt tutt stracch ‘mè on pilàtt.