Le mamme co le carrozzale
A spasso le va su la riva
E sprote come da putele
Le torna alle signore xogar
Desmentegando forse
Che el fio dentro el xe vero
E se el ga la testa a pero
No se ghe la pol cambiar
Se le furega le coverte
Xe facile piuttosto
Che in quel pò pò de posto
No le sapia el fio trovar
A una, a do, a tre
Le carovane le cammina lente
No ghe ne importa se
Su la riva più no pol passar la zente.
Ma mi vorrai che fussi co le se incontra
E un poco sentir cossa le se sa dir
“Ma che vedemo che belo che xe ‘sto fio
a dir la verità el xe megio del mio!”.
“No la me staga dir che el suo el xe un colosso
co tutti quei bei denti quel là el se magna un osso!”.
“A chi el ghe somegia?”. “Me par metà e metà”.
“A mi el me par el ritratto preciso del papà!”.
“Ghe dormelo de notte?”: “Macchè che el xe un bastardo
el se desmissia subito appena che lo vardo,
‘na volta el te vol el ciucio, in brasso el te vol star,
ti te trovi intrigada anca par ‘sto magnar, però el ghe ride a tutti!
“davvero sala; anca so cugini
– va ben che i ga el viso da mona –
però appena che li vede, el ghe ride!”.
Le mamme co le carrozzelle
A spasso in cicchera le parla
E tante ghe ne xe de quelle
Che parla parfin in italian
Ma presto i anni passa
E insieme alle carrozzele
Va via le raffinatezze
Le bocca vien normal
Che par ciamar so fia
“Mariaaaa
Che zoga al campanon
“Nata d’un can, vien qua che ti ga andar in bottegaaaa”.
Ghe dixe ‘na vicina:
“Siora Giovanna, data che la ga la bocca verta,
la ciama anca mia fia per piaser?”.
E tutto va benon.
