Pepp va pian

Mi l’altra sira de cà sont sortì
cont i sacòcc ch’eren pròpi sfinì
gh’evi voeuja de bev a gran volontà
ma a mí a crètta nissun me ne dà.

Troeuvi on amis ghe disi: ‘«ohèj tì
famm on piasèe, oh sí fammel a mì
prèstem cent franch te’l doo doman»
ma lù’l me dis «ohèj Pèpp va pian».

Voo a l’osteria per bèven on mezz
bèven on mezz o magari on quartin
ghe disi a l’òst «dàmm de quel bon»
sto lavativ el se tira in d’on cantón.

«Se te voeuret bev foeura i danée
o se de no tíres via di pée»
«Dàmen on mezz te’l paghi doman»
ma lù’l me dis: «ohèj Pèpp va pian».

Cont ona faccia tutta rabbiada
per andà via mi infili la scala
e voo de sora compagn d’on locch
la mia miée la me dis che sont ciocch.

«Ah mí sont ciocch, brutta veggiazza
mí te doo on pugn che te s’cèppi la faccia»
e foo per dàghel, alzi la man
lée la me dis: ‘«ohèj Pèpp va pian».

Cosí pian pian, cosí bell bell
mi voo in cusinna e me tacchi al sidèll
la mia miée, sta brutta barbonna
«bev chela lì – la me dis – che l’è bonna».

Se gh’emm de fà, se gh’emm de dì
l’è mèj bev l’acqua puttòst che morì
se gh’emm de dì, se gh’emm de fà
l’è mèj bev l’acqua puttòst che crepà.

Ma poeu voo in lett ‘me on tulipan
la mia mièe ohej la slonga on poo i man
la me tampina, ma mi foo el nostran
hoo bevuu l’acqua, adess ten giò i man!