Testo di
Marco Candiani – Musica di
Claudio Merli
Rideven, rideven su per ari
Intant che me guardaven i stell d’on fioeu de strada.
Rideven, faseven nanca finta
Però lor me spiaven i sogn che m’insognavi.
Saveven che i sogn de la mia vita
Eren domà chimera, speranza gemò morta
quand sul marciapee mi pitturavi
on gir d’Italia faa coi tolitt
‘na principessa indiana
in la tempesta su la nav che la sprofonda
mi salvaroo e in India
me farann maragià pien de or, pien de danee
quanti speranz per ari
e quanti sogn per fa rid i stell,
fantasii d’on bagai che’l voreva
diventà on general, forsi on re
o on coridor che al gir d’Italia in maglia rosa.
Stasera me guarden ‘me ona volta
I stell che me spiava quand s’eri on fioeu de strada
E riden perchè mi el sabet sera
el passi in d’ona piola, ragioni col barbera
e guardi, rifless in la bottiglia
i sogn perduu per strada intant che mi cantavi
e me setti giò anca stasera
dent l’osteria e vedi anmò
la principessa indiana
che mi salvavi quand el mar l’era in tempesta,
giughi ancamò a la guerra
con duu legn mettuu in cros ‘me la spada d’on soldaa.
Poeu me indormenti al cine
e insci me insogni ancamò speranz
per fa rid milla stell ‘me ona volta,
quand scoltaven i sogn d’on por fioeu
che’l s’è perduu sora i sentee ingarbiaa de la soa vita
