(Enea Danese)
Pilloneddus chi a nuis coloradas
ricamànt tanti fantasias
tra is mindulas, bingias i olias
e in is artas linnas profumadas
de sinzillu celu coloradas
in su mari puliu di Orri
totu cosas bellas passadas
immoi ingunis nci nd’est de morri
nc’est de morri po sa timoria
furisteris de attesu arribaus
sa tzitad’e is tubus trotoxaus
gei dd’ant beni costruia
parit ira mala benia
chi appetigat e si fait sciala
de sa genti nostra in tribulia
no eus connotu prus cosa mala
no eus connotu e ne bistu mai
su dimoniu fait a sa muda
ma is trintas dinais de giuda
mai a nemus ant a arricai
pran’e montis sighint a serrai
po nci ponni is mostrus de gherra
aundi trigu depiant arai
is messaius chena de terra
sentz’e terra e sentz’e traballu
crescit solu su filu spinau
non nc’est pisci in su mari imbrutau
cuddu mari chi pariat cristallu
su pastori nci ‘ogat su tallu
cun su coru de abetu prenu
ma sa morti sighit su ballu
totu cantu fueddat de venenu.
