El famos inconter tra ‘l filosef Diogen e ‘l Carnevaa

Album

È contenuto nei seguenti album:

Testo Della Canzone

El famos inconter tra 'l filosef Diogen e 'l Carnevaa di Canzoni Milanesi

Canzoni popolari Lombardia

Diog. L’ è Diogen quel gran om
Ch’ el cerca tra tanti on galantom

Car. Vu Diogen ? … Quel vagabond
Che l’ era odiaa da tutt’ el mond?

Diog. Oh si pur trop l’ era odiaa
Perchè ‘l diseva la veritaa.

Car. Da fav savè no fa besogn
Che l’ è tant’ agn ch’el dorma on sogn.

Diog. E per quest ?… Ve poss respond
Che per on moment l’ è tornaa al mond.

Car. A fa che coss ? Cercà i lumag ?

Diog. Del vizi a guarì tant cattiv piag.

Car. Vorrii on parer de bon fradel ?
Tornee a intanav nel vost vassel;
Tornee a smorzà quel Lanternon,
Tornee a dormì la nel foppon;
Perchè se mai ghii el schiribizzi
D’ andà per el mond a stroggià i vizi.
Ris’ ciarii per i contrad
D’ ess la calamita di sassad.

Diog. Credii che mi gh’abbia pagura
Ch’el mond me faga quai rottura?
Basta che la lengua nol me storta
Che vaga el rest poc me n’importa.

Car. Possibil mo che no trovee
Quell’om giust che vu cerchee?
Me par però tra tanta gent
Che trovarii almanc el vun per cent.

Diog. Mi ho giraa Borg, e Zittaa
E no vist che di omen mascaraa;
Son staa in di cassin là tra i villan
Di gatt ho trovaa de quii sorian;
Son staa tra i sciori, e a prima vista
Ho trovaa di avar, di egoista;
Tra i poverit ho slonga ‘l ciar
E ho vist di furbi, e di somar;
Son staa tra i amis, e tra i parent
Ho vist l’invidia, e ‘l tradiment,
Son staa tra i donn, e tra i tosan
E ho vist la malizia con l’ingan;
Ho giraa per i bottii
Ho scovert l’impostura, ed i bosii;
Ho rugaa anc i maridaa
E ho vist l’intrig, l’infedeltaa;
Son staa tra i artista, e i operari
E ho vist di furbi e di falsari.
Son staa finalment tra i Bettolin
A ved convertiss l’acqua nel vin

Car. Consolev finalment che avii trovaa
On ver galantom nel Carnevaa.

Diog. El Carnevaa l’è on galantom?
Vun senz’onor, e senza nom?

Car. Vun che porta l’allegria
A chi pias i fest, e l’ostaria;
Vun che mett in moviment
I donn, i moros, ed i servent,
I sart, i Marcant, i Perrucchee,
i vicciurin, i Oreves, e i Pattee,
Quel che porta la carestia
Al cassinot de la polleria,
Quel che porta la cuccagna
A chi può spend, e chi guadagna
Ai Bois, ed ai Trattoeur,
E a quii di Festin là de parpoeur ,
Che i sonador fa vegnì grass
Col scond i pollin nel contrabass ,
Che fa corr i vicciurin
Col polleder de ciocchin ;
Che ingrassa i Museg e i Cantant,
I Ballarin, coi Commediant,
Da ciamal no ghi rossor
On om senza credet, e senz’onor?

Diog. Si, quel che hai Donn leva ‘l giudizi,
Che fa la cort a tutt’i vizj,
Quel mezz matt, e quel bamboc
Che del dì forma la noc,
Quell’imbriag, quel crapolon
Che strascia i pollin, suga i peston,
Quel che mett guai e scompigli
Nei fioeu de tant famigli;
Che mett i marì de mal umor,
Che cress el numer di creditor,
El cap di imbroj e di pastina
El ciamaroo mi on om da driz ?

Car. Ma tutt’i agn la sozietaa
Sempre la m’ha desideraa ;

Diog. Desideraa di turluru :
E di mezz matt come sii vu.
Coss’ hin sti vantag, e sti piasè
Che pretendii da fam vedè ?
Quatter festin con di tosan
Che spuzzun de rost e rostician;
Mett una mascara dove sovenz
Se dis di spegasc, d’impertinenz
Fa di ozios, e di mocchitt,
Sbregà di danee senza profitt

Car. Semel in anno licet insanire
Diseva Marc Tulli Ciceron,
Quel che col stec mangiava i maccaron
Cioè, permess l’è all’om de fatt
Na voeulta l’agn da fa de matt

Diog.Ma vu dovii ess informaa
Che adess tutt l’ann l’è carnevaa,
E senza besogn d’andà in Teater
Nun podem vedè tutt i caratter
Nun vedem di furbi, e d’impostor,
Di poverit che fa de scior;
Di scrocconi, e d’imbrojò
Sul dagn di olter a fa ‘l fatt so;
Nun vedem paric andà in ruina
Per mantegnì na quai strascina;
Di protettor nel temp d’adess
Che fan d’amis per interess;
Di pader de legn mader de stoppa
Di mari senz’veuc e senza bocca;
Di donn oec tenc de bellet
Per fa i galant, e i giovenett ;
Vedem stimaa tanti somar
Perchè coi danee gh’an da fass ciar;
Da quest tirem la conseguenza
Che tutt è mascra, ed apparenza.

Car. Ma con sto voster predegott
No avii conclus on bel nagott;
Perchè da ch’el mond l’è sta piantaa
De matt no gh’è mai sta scarsitaa.

Diog. Donc concludem sur Carnevaa
Podii tornà dove sii staa
Perche de mascher, e de finzion
Ghe n’è tutt l’ann d’ogni stagion ;
E chi ha danee da buttà via
Gh’è semper di fest dell’allegria.

Car. E mi iscambi intimi a vu
Che a sto mond torne mai pù;
O sur Filosof di bojoc
Fioeu della fam, cap di pittoc,
E renonziee quella Lanterna
Al Custod d’una Caverna.

Diog. Va pur tra i matt in allegria ,
E di all’agozzin da parte mia
Che ogni tre or col so gnervett
El te lustra el preterit imperfett.

Car. Se colla tova filosofia
Te voeu vegni a fam compagnia,
Farem corr el burratton
Ti colla frusta, e mi ‘l baston.

Diog. Che se bandissa ho decretaa
Eternament al Carnevaa.

Car. E mi col scovin della cusina
Condanni Diogen alla Berlina.

FENIDA.

Il testo contenuto in questa pagina è di proprietà dell’autore. WikiTesti è un’enciclopedia musicale con lo scopo di far conoscere a quante più persone possibile il panorama musicale.

Commenti

Lascia un commento

Il tuo indirizzo email non sarà pubblicato. I campi obbligatori sono contrassegnati *