El me’ indiriss de doe son nassuu
mì me le ricordavi gnanca pù:
a l’era una cà vecia e per pissà,
tripli servissi, sì, ma in mezz al prà!
El me indiriss de doe son nassuu
me l’han ricordà ier, dentr’in Común:
cercavi un documént de residénza
e mì, m’è vegnuu in ment tutta l’infanzia…
A s’erum ona banda de sês fieou;
volevom trà per aria tutt’el mond,
fasevom la colletta alla mattina
per quatter Alfa e dù Esportasion
Tornavi a cà la sera, e la mia mamma
la me nettava el nas tutt spurch’de sang’
perchè la legge l’era de dài via,
ma l’era anca quella de ciapànn!
Pensarci ben, chissà che fine hann faa
chî mé compagn balord de s’cioppà el mond!
Ma poeu, la vita va; fa quel che voeur:
chi va, chi resta chi, chi invece moeur…
Ma hinn giamò passaa dù o trii minut
e mì, me rendi cont che hoo rott i ball:
ci ho qui on bel document de residénza…
cià via a menare! …e scaricare anca l’infanzia!
