El pret de Ratanaa

Album

È contenuto nei seguenti album:

Testo Della Canzone

El pret de Ratanaa di Walter Di Gemma

Canzoni popolari Lombardia

In la via Fratelli Zoia col sò òrt e la soa cà
el viveva senza tònega on lunatic scior curaa
Coi decòtt i benefizzi el donava a cent curios
che da lu con sacrifizzi se fiondaven fiducios.

Don Giuseppe Gervasini detto “Pret de Ratanaa”
coi sanguett e cent impiaster el guariva i sò malaa.
Senza dì l’Ave Maria ie ciappava sòtta brasc
con ‘na longa terapia de centmilla parolasc!

“…Ohej ti donna imbellettada, el rossett che te ghee su
saria mej che tel mettèset non sui laber ma sul cùu!…
….Ciapa ‘l manic de la vanga, minga quell del tò Marcell
va a streppamm l’erbetta marscia e rivòltom l’ortisell!”

On bell dì gh’è rivaa denter on omett paralizzaa,
el gh’ha dii : “Mi sògni semper de podè imparà a novà!”
Senza ciaccer, né consili, su la Ripa l’ha portaa;
l’ha rusaa giò in del navili e…Miracol…l’ha imparaa!

Don Giuseppe Gervasini detto “Pret de Ratanaa”
cont i ris’c e cent disaster el guariva i sò malaa
Senza dì l’Ave Marìa ie ciappava sòtta brasc
con ‘na longa terapìa de centmilla parolasc!!!

On vegett de via Marghera el gh’ha dì:” Pietà Signor,
gh’ho in del còll mattina e sera ona valanga de dolor….”
Guarda nò i tosann per strada, quand s’è vècc l’è semper mòll;
te concludet mai nagott e poeu te vègn el stòrtacòll!

El prevòst in de la stòria el sò pòst l’ha conquistaa
per on fatt che in la memòria de la gent l’è anmò restaa…
In quel dì ormai leggendari sora’l tram di Fòrz Armaa
el s’è accòrt el bigliettari ch’el prevòst l’ha nò pagaa!

El gh’ha dii: Scior reverendo, me dispias, ch’el vaga giò!
Lu l’ha dii : Va beh, io scendo ma’l tranvai per mi el va nò!
L’è staa inscì ch’el scior vicari l’è ‘ndaa giò senza fiadà
ma ‘l tranvai sora i binari tutt el dì l’è staa bloccaa !!!

In la via Fratelli Zoia gh’è anmò l’òrt, anmò la cà.
On quaj vun l’ha dii : Che nòia senza el Pret de Ratanaa!
In compens gh’hinn cartomanti che soddisfen tutt i voeuj;
de miracol ne fann tanti…ma fann mal al portafoeuj!!!

Il testo contenuto in questa pagina è di proprietà dell’autore. WikiTesti è un’enciclopedia musicale con lo scopo di far conoscere a quante più persone possibile il panorama musicale.

Commenti

Lascia un commento

Il tuo indirizzo email non sarà pubblicato. I campi obbligatori sono contrassegnati *