L’aqua

Inverno del cinquantaun
s’à roto l’arsene del Po
la piena i campi ga ‘lagà
cristiani e bestie s’à negà

Aqua

I elicoteri xe rivà
e i vivi duri co’ le man
dai copi le corde i ga vantà
e in celo i se ga rampegà

Aqua

Dai elicoteri in stassion
i vivi dopo l’aluvion
i parte in Belgio e a Milan
ancora sporchi de pantan

Aqua

S’à perso le lagreme nel Po
contarle tute no’ se pol
contar i tosi che xe restà
te basta i dei de ‘na man

Aqua Aqua Aqua Aqua

Xe ‘sta ‘na note che ‘l signor
ga vudo un palpito de cuor
el monte Toc se ga spacà
el lago in celo xe rivà

Aqua

L’onda la diga ga saltà
e Longarone ga ramassà
i gera in leto drio dormir
no’ s’à salvà gnanca un cussin

Aqua

Entra la corte in tribunal
i morti in pie s’à alzà
la corte se ga pronuncià
«sé morti per fatalità»

Aqua

Sarà i pecati che se fà
el padre eterno sarà incassà
ma co’ ‘sto Dio malà de cuor
xe sempre i poveri che muor

Aqua Aqua Aqua Aqua.