Canzoni Siciliane
Omini, donni, picciriddi e vecchi
sintiti tutti li travagghiaturi
ppi chista fidi rapiti l’aricchi
ppi chista fidi ca si chiama amuri.
Amuri ppi lo pòpulu sfruttatu
e ràggia ppi li ricchi e li patruna
amuri ppi l’oppressu e l’angustiatu
ràggia ppe traditura e li latruna.
U riccu mangia bonu e dorme assai
iddu ci menti a panza e nui u travàgghiu
saziu tu non lu poi truvari mai
nuatri ‘n’amu addubbari a pani e àgghiu.
A nostra ràggia contro i sfruttaturi
avi vint’anni ca a abbiamu o ventu
i falsi comunista tradituri
si la vannu vinnennu o parlamentu.
Ni cùntunu di lotti ca vincemu
di ranni passi avanti c’amu fattu
ma sempri o stissu puntu nuatri semu
fra u pòviru e u riccu nun c’è pattu.
Ìttanu ‘n terra la bannera russa
pénsunu sulu e voti pp’acchianari
ppi stari cche patruna fannu a cursa
u pòpulu ci aggiuva ppi vutari.
Ma la bannera russa arrisurgìu
di ‘n terra fu ‘nta l’aria ‘nta mumentu
i veri cumunista arricugghìu
contru i patruna e contru u tradimentu.
Nasciu u partitu i tutti l’operài
fattu di comunista giusti e boni
chiddu ca non ni pò tradiri mai
fa addivintari u pòpulu n’unioni.
L’unioni fa la forza e a forza vinci
vinci e patruna e tutti i tradituri
la lingua parra schetta e cchiù non ‘mpinci
u pòpulu è lu veru salvaturi.
