Metamòrfòsi – El Luisin tassista

Musica di U. Marino

In doe i rottamatt gh’hann i vettur

coi ossadur di camion impignaa,

a gh’è i gallin special che becchen sù

bollon e fil de ferr, ranell de ramm.

E quand farann i oeuv, se poeu je fann,

sarann compagn di roeud però quadraa,

che fann girà el mond che l’ha cambiaa

el sòlit gir de quand che l’hann creaa.

E la nòtt, la nòtt pur anca lee,

per minga restà lì in deperlee

l’ha ligaa sù come nagòtt

on poo de stell in d’on fagòtt

El mar, el mar pur anca lù,

per minga restà lì in deperlù

el gh’ha robaa on poo de ciar

ai ragg del sô senza fà on sgar.

I manicòmi adess hinn saraa sù.

La gent inteligent hann pensaa lor

coi sentiment di matt, a cambià el mond.

E giust per quell gh’è i fior senza color.

Mai pù el coeur el sà se l’è l’amor.

Gh’è pù de gentilezz e de carezz.

Inscì domà per viv se tira là

cont i rigòrd del temp giamò passaa.

Invece el foeugh gh’ha regalaa

on cicinin de cald al fregg,

per riscaldà i lugher de nev

che borlen giò da l’alt del ciel.