Canzone milanese di osteria
parodia della nota canzone degli anni venti “Come pioveva“, di Armando Gill
Canzoni popolari Lombardia
Berto e i sò amisHoo incontraa ona certa tizia
in d’on trani in via Verzée
Quand l’è stàa l’ora propizia
la m’invida in lett con lée
Ma in del bell che cicciaràvom
tutt e dúu come niente fuss
sentom vun ma che’l vosava
ch’el piccava fort a l’uss.
Salta foeura de volada:
«oh Signor l’è el mè marì…
chissà adess che ressumada
còssa foo??… povera mi!»
Mì tutt stremí cont el frecc che faseva
mezz in camisa coi dent che batteva
sont scappaa sòtt al lètt addirittura
ohej che paura! ohej che paura!
La ghe derva e lú el vègn denter
la furbona la fa lée:
«a gh’hoo on gran dolor de venter
va toeu quajcoss in del speziée»
«L’è nagòtt, l’è ‘na cialada
te gh’avarée on poo de calór
te faroo ona limonada
passaran tutti i dolor».
L’hoo sentuu cavà i braghin
poeu andà in lètt insemma a lée
e mí lí, porco sciampin
a tremà de capp a pèe!
E poeu hoo sentúu ma tutt quell che diséven
poeu hoo sentúu anca tutt quell che faséven
intant che lor in del lett se rusàven
i me pée gelaven, i mè pée gelaven.
Hoo sentúu che lú el cercava
l’orinari lí per lí
hoo sentúu che lú el rugava
pròpi indove che s’eri mí
Tutt a on tratt el pèe el me ciappa
el tira fòrt foeura del lett
mí del spavent tuttcòss me scappa
e resti biòtt cont i calzett
Lú el vosava e mí a pregà
l’era on quader del Turchin
del baccan s’hinn dessedàa
el portinar cont i inquilin.
Hinn cors de sora tutt quant de premura
òmm, dònn e fioeu in camisa addirittura
e m’han pestàa come ona cotelètta
ohej che disdètta, ohej che disdètta!
Del prossimo tuo rispetta la donna
inscì la diseva la mia povera nonna
e mí crapon che l’hoo minga ascoltada
se l’hoo ciappada la pettenada!
