Noeuva Bosinada sovra l’abbondanza del vin
Milanes l’è chi el bosin
a cantà i bondanz del vin
e la rabbia di brugnon
per tegni pu su l’oreggion
come han faa in stagn passaa
e dové vendel bomarcaa
Canzoni popolari LombardiaI.
L’è fenida la stagion
Dove tutt i Ost Brugnon
Faseven pagà in st’agn passa
Trenta sold el vin al boccaa,
E sold vint quell’olter vin
Ciamaa lavadura de conchin.
Mi me senti a slargà ’l coeur
Che l’è finida se Dio voeur
La stagion de carestia
Da dovè bevv come sessia,
Ch’el giornadee, e l’operari,
El poverett, e l’usurari,
El sciorett, el servitor,
E tutt qui che no g’ha on bor:
II.
In andaa a bevv per tutt quest’an
Dove se van a sposà i rann.
Per no consumà la soa giornaa
Nomà a beven on mezz boccaa.
Allegrament o Cittadin
L’è chi la stagion del S. Martin,
E ona stagion come quest’ann
Che tolt di loeug dov’ a faa dann
O la nebbia, o la tempesta ,
ona stagion come l’è questa
Che han faa uga fina i frasc:
Dem da man chi ha on bon fiasc
E femen di pell con el boccaa
Per i degiun de stan passaa.
III.
Calzolar, e Sciavattin,
Ciamaa per nom i mangia vin,
Manescalc, e legnamee,
Giusta pignatt, con i ferree,
Sart, imbrojò, pattee,
Sbianchin, servitor, strasciee,
Prestinee, pizzigott, banchinatt,
e d’ogni strazion de bottiatt,
e tutta quella razza paja
Che se ciama vesinaja,
Con tutt el seguet di sposett
Che sta sui port a fai braghett
In general el vost Bosin
V’invida tutt ai Bettolin
IV.
A mangià salam, e oeuvv
E a bevv di pint de bon vin noeuv
Passaroo prima a insegnà
I loeug mei dov hii d’andà
Per spend poc e bevel bon
Senza depend di avar brugnon.
No ste andà in Porta Romana
Perchè nol vaar ona pu…
In Porta Comasna ai bettolin
L’è pussee acqua chevin,
Andee donca o Milanes
A Porta Marenc, o ticines,
O pur portevv in Porta Renza
Ciamaa de la reconossenza.
V.
Che bevarii del bon vin scett
El bavarii a prezi discrett.
Se vorrii bevv del bon crodell
Andee in la contrada dell’Agnell,
Al pasquee la di Gajnn
Dove ghe va anc di signorin,
Con la sciarpa, e la perrucca
A impiss de vin pescg d’ona zucca.
Anca la dov’è la stretta
La de S. Maria Segretta,
Bevarii del vin d’agraa,
E della Brianza a bomarcaa
Anca in porta Vercellina
In paricc sit venden ciorlina.
VI.
Ma lì al Bacc, e al castell,
E massem là visin al portell,
Se bevv ve dighi del bon vin
Tant de ross, che tolborin.
Se vegnii poeu sul Pontasc
Vu impegnee per fina i strasc
Per andà in quella cantina
A beven de quel della collina.
On mei loeugh poeu no se troeva
Com’e ’l bettolin de porta noeva
La tant noevv, come quel vecc,
El fa verament drizzà i orecc,
E quel l’è propri de quel vin
Che fa di voeult parlà latin.
VII.
Dove se troeua del bon vin
In di spadee, e al Rebecchin,
A Camp Sant, e sul Verzee,
E in la contraa di Armoree,
In Contralarga no ghe andee
Perchè l’è bon da lavè i pee.
Tutt i boeucc li adree al Dom
Sarii Servii de galantom,
Ai cinqu vii, e sul cordus
G’han di ciaccer, e di scus.
Alla Roeusa, e la in di Ratt,
El se bevv bon ma l’è on poo fatt:
Vers S. Giorg là al Palazz
Ghe del vin noevv da fan di sguazz:
VIII.
Ma fradellas tant no se pò
Perchè l’è mesciaa con l’oltre Pò
Ma se tutt de man in man
Avess de di i boeucc tutt de’ Milan
L’è minga assee che mi stass chi
Ses o vott, o quindes dì.
Basta savè che in stan che ven
Per el vin starii pu ben
De quel che per la scarsitaa
I degiunaa in stan passaa.
Giacchè parland di loeugh in massa
Che se troeua chi alla bassa
Han fa del vin in abbondanza
De bona sort, e de sostanza.
IX.
Sebben mi son d’opinion
Che tutt i Cittadin Brugnon
Chi vorrà corr all’Ostaria
Ghe metteran sù la spezieria,
E chi vorrà bevel badial
Boeugnerà dac anc mo al boccal
I vintiquatter, o i desdott,
E fa de locc e di nagott,
Ma in sto cas all’Ostaria
Ghe andarà la compagnia,
Generalment de quella gent
Che g’han mezz e coeur de spend
E che poc g’ha da importà
De sti Brugnon fass inciodà.
X.
Ma la gent ch’in limitaa
In di risors, con poc’intraa
E che mesuren el quattrin,
Se on quai biccer vorran de vin,
Andaran ai bettolitt
Tant per god maggior profitt
Già che se sa tutt i Brugnon
Col pretest, colla reson
Del fitt, di aggravi, e olter pes
Scorteghen viv i Milanes
Che qui poc voeult che van de lor
Anca sibben che sien scior
Boeugna dil senza ritegn
Che per on pezz ghe resta el segn.
XI.
Ma sora al tutt ve fo avvisaa
Che nell’andà a vojà i boccaa,
Usee on puo moderazion
Perchè el vin noeuvv in sta stagion
Ch’il le bevv senza mesura
Faran per i straa brutta figura,
E marcaran la brutta impronta
Ciamaa da nun arma Visconta,
E in gener de arma già savii
Che in sti temp in proibii
Giac chè tutt i Cittadin
E ricc, e pover, e meschin
Formen adess per maraviglia
Tutt ona razza, e ona famiglia.
XII.
Sievv donca moderaa
Se on mezz no basta, anc on bocca,
E se i amis ve dan na spinta
Marciec a beven anca ona pinta;
Fina chi ve do al permess;
Ma se vorrissevv anda all’eccess
Fina de toccal coi did
E poeu menà i man a taccà lid,
Allora ve ordini na rizzetta,
Cioè la soleta dieta,
La soleta penuria e scarsitaa
Che avii provaa sti agn passaa
Se sta bondanza in conclussion
La da portà dan alla complesion.
XIII.
Andee pur a sti patt chì
All’Ostaria tutti i dì,
In di bus, ai Bettolin,
A stostentavv con del bon vin,
Massim infin della giornada,
Con i voster camarada,
O verament colla Miee
Colla scorta del palpee,
Con dent i avanz del vost disnà
O del formai per pasteggià
De quel che va attorna da per lù
Che dopo mangiaa el torna su.
O del stracchin de quel salaa
Tant per vedè el cuu del boccaa.
XIV.
Viva donca la stagion
Da podè bev del gran vin bon.
E beven assee e a bomarcaa
Minga pu al segn de l’an passaa.
Minga pu ne vint, ne trenta,
Ne manc tant zecchin per ona brenta
Ma a vott, a sett, o a dees.
Respiree i mee Milanes
Che avii fenii de degiunà
Da fa di vood, da sospirà
E per carestia de scarsella
Andà a bevv alla sidella:
Che quel temp l’è poeu rivaa
Da bev del vin bon a bomercaa.
F e n i d a.
