Tosetta vestida de ròsa – El Luisin tassista

La ròsa l’è on fior

ch’el parla d’amor.

L’è on bell parlà,

penser trasparent

che fann medità.

E con tutt quest,

quand pioeuv sul seren

pòdass che l’è on ben.

On menestrell

con la ghitara

per circostanza el canta

d’amor ona romanza.

Tosetta vestida de ròsa!

Con tant ardor ‘sta serenada

de sòtta d’ona luna inargentada,

on tò inamoraa la voeur cantà.

Tosetta vestida de ròsa!

Anima e coeur e i desideri,

a l’è del traguard de la vita,

on tò inamoraa el voeur sognà.

Regina di fior

la parla d’amor.

La gh’ha ‘l color

tant bell come tì

‘me ‘l tò vestii.

Confus tra el verd

in fond del giardin,

on biond angiolin

domà per tì,

sòtta la finestra

per el tò di de festa

te fà la serenada.