Marina di Melilli

Unni sunu l’omini
e li fimmini ‘i “Marina”?

Ccu u sa’ se poi ci pensanu
a ddi strati, a dda matina?

Li fabbrichi ca fumanu,
focu e poi sireni.

Li camia e li partenzi,
valigi di cartuni.

Li casi russi ccu li vucchi storti,
lu suli li rimodda e poi li futti.

Li casi gialli ccu li ‘ntinni ‘n testa,
si sentunu azzizzati ancora a festa.

Chi resta?? Chi resta??

Unni sunu dd’omini,
li pulitici ‘i “Marina”?

Hannu sempri ddi gran machini,
e la panza sempri china?!

Li borsi ca ci fetunu,
di merda e di dinari?!

Duminica a la missa!
E poi cci piaci u mari!

Li casi russi ccu li vucchi storti,
lu suli li rimodda e poi li futti.

Li casi gialli ccu li ‘ntinni ‘n testa,
si sentunu azzizzati ancora a festa.

Chi resta?? Chi resta??