Parlum mea de barbera,
nel buceer gh’è la dencéra
che la riid senza de me
e sun ché cun l’infermiera
setaa giò sö na cadréga
che la viàgia de par lee
e anca el suu nel curiduu
me paar piö lüü, a el vöör parlàmm
dumandi al laagh, da la finestra,
se’l se regòrda chi è che sun
per questa geent che vee a truvamm
cun scià i biscott sun piö nagott
dumanda ai pèss, dumanda ai sàss,
che luur la sànn quel che ho vedüü
Perchè adess g’ho sö el pigiama ma regordes
che una volta seri el re di pescaduu,
ho vedüü sguaràss el laagh, ho vedüü quatàss el cieel
e la loena burlà giò,
l’era faa cumè un’ anguila, l’era gross cume un batèll
e’l majava tücc i stell,
una bissa incatramada, cun la buca sbaratada
e cui öcc dell’ oltrumuund…
un mustru, un mustru, un mustru, ma l’era mea el film de l’uratori
un mustru, un mustru, un mustru, vegnüü’n de un teemp che l’era piö el sò
E i m’hann truvaa luungh e tiraa cunt i öcc de indemuniaa
che parlavi de par me
“Vardii el re di pescaduu, stravacaa in so la sua barca”,
che’l se sbatt cumè un cagnott!”
m’hann dii che el mustru l’era el diabete
per mea dimm che seri màtt
quand che passavi me salüdaven, quand se giràvi sentivi riid
vegniven tücc a crumpà el pèss per ghignà un zicc a per cumpatìmm
gnanca i fiöö m’hann mai credüü e seri el re di rembambii
Perchè adess g’ho sö el pigiama ma regordes
che una volta seri el re di pescaduu,
ho vedüü sguaràss el laagh, ho vedüü quatàss el cieel
e la loena burlà giò,
l’era faa cumè un’ anguila, l’era gross cume un batèll
e’l majava tücc i stell,
una bissa incatramada, cun la buca sbaratada
e cui öcc dell’oltrumuund…
un mustru, un mustru, un mustru, ma l’era mea el film de l’uratori
un mustru, un mustru, un mustru, vegnüü’n de un teemp che l’era piö el sò
Ho veduu el mustru, ho veduu el mustru, s’erun mi e’l mustru,
el mustru in mezz al laagh
Dumà me e’l mustru, dumà me e’l mustru, s’erun mi e’l mustru,
el mustru in mezz al laagh
Adess g’ha sö el pigiama ma sun che sura un puntil
a specià che’l solta fö,
sunn piee de medesèn, me parlen tücc de arterio,
ma sun che per fala fö,
te speci setaa giò cun in man dumà una frosna
e sun propi mea stremii,
facch vede a ‘sti tòcc de merda se te seet deent in del laagh
o nel coo de un rembambii…
un mustru, un mustru, un mustru, senza i me occ el ghe sariss mai staa
un mustru, un mustru, un mustru, vegnüü’n de un teemp che l’era piö el sò
Ho veduu el mustru, ho veduu el mustru, ho veduu el mustru, el mustru vardamm
Ho veduu el mustru, s’erun mi e’l mustru, dumà me e’l mustru,
el mustru in mezz al laagh
Parlum mea de barbera,
nel buceer gh’ è la dencéra
che la riid senza de me.
