Dialog tra Parpotera e Barlafusa
sull’ingann di sogn, suppost bon per giugà al lotto
Canzoni popolari Lombardia
Par. Oh la mia cara Barlafusa
La vengeta al lott l’è andà busa,
Se in grazia ch’hii minga savuu fa
I mee bei sogn a induinà.
M’hii dit ch’el toeugh de scoldalett
L’è desdott, e’l vintissett.
Dove in scambi mi hoo savuu
Che l’è duu, e settanduu.
L’ottanta sett hii dit che l’era
El loeug de frusta e de gallera;
In temp che san tutt i donnett
Che l’è ‘l trentun col vintisett.
Bar. Ona lottista come mi
Che tutt i donn no foo per di
Ogni strazion quand fa besogn
Vegnen de mi a fa spiegà i sogn,
Come se fuss on quai salam
I de sta chi a mortificam?
Par. Scusee se mi ve foo st’affront:
Perchè ho pers l’ambi per on pont;
S’el loeug de fevra, e dospedaa,
La parturienta, e la comaa
L’è’l cinq, el noeuv, e l’ottantun,
El trentatrii el loeug comun.
Bar. Se ved che in gener chi del lott
No savii giust on bel nagott.
Savii però che la in ca mia
Tegni ona mezza libraria
Che la tratta in conseguenza
Dei sogn del lott tutta la scienza;
Gh’hoo’l famos Mirandolan ,
La Borsa d’or, la sort in man,
La Ciav d’or; e chi per dilla
I gabolit della Sibilla,
E tutt i nom ve poss respond
Con i cognom che gh’è a sto mond.
Par. Con sti bei coss che millantee
Mai una voeulta induinee,
E fin adess mi n’hoo sentuu
Che induinee quant in vegnuu.
Per spiegà i sogn a sto moeud chi
Per veritaa sont bona anch mi.
Bar. La sura Calara, e la Gossett
Gh’ho minga fa veng on bell’ambiett.
La sura Tecola in st’inverna
La guadagnaa per mi on bon terna
La Bombolott, la Balborin
La pur temp fa ciappaa on Zecchin?
Par. Vedem on poo con si resson
Se adess vorrii dam i numer bon.
Loltra nott me so insognaa
Che on zert amis, e me Compaa
El ma menaa la in Borg di goss
A mangià i ciapp con li baloss,
E tutt a on bott sem trovaa lì
Col legn in man poeù mè mari
Ross in faccia comè on gall
Per dan el caffè sui noster spall.
Adess mo fem ved el vost talent
Che numer del sogn ghe trove dent
Bar. El loeug de ciap, coll’osterìa,
El marì cold de gelosia,
Col legn in man ross, e rabbiaa
El borg di goss, con el compaa
L’è l darsett, coll’ottantun,
El vintiquatter, e sessantun;
Ma tutt sti numer poeu dopò
Bisogna voltai col coo in giò.
E per provai se poden mett
Sott al cossin quand andee in lett ,
Se v’insognee poeu ch’el pajon
El brusa in fiamm, allora in bon.
Par. Sentii mo quest d’ona vesina:
La se insognaa che in la cusina
La vist ona scimia, ed on castraa
Che visitava un ammalaa
E tutt a on bott quel ch’era in lett
El se veduu tirà colzett;
Dopo queschì n’oltra vesina
La vist on tor con la gajna
A fa tra lor on manuè
A son de tambor, e d’oboè ,
E on barbee con polizia
A scortegà i barb in beccaria.
Bar. El loeugh de scimia, e de motton
L’è l’ottantott senza question
Per l’ammalaa che creppa in lett
L’è quindes, tredes, col darsett.
In quant al tor colla gajna
Boeugna savè dalla vesina
Se lera da quei che la in verzee
Se vend coi speron visin ai pee;
Allora l’è quindes, e quaranta,
Dees, e sedes col settanta
Per el barbee tegnii a ment
L’è’l loeug de stell, e de torment.
Par. Così el loeug de luna piena?
Bar. Ciamel a chi dorma alla serena.
Par. El loeug de acqua insemma al vin?
Bar. Andee a domandag ai Bettolin.
Par. El loeug de pastìzz, e de caprizi?
Bar. Ciamel a quii donn senza giudizi
Par. El loeug de zucc e de melon ?
Bar. Ai Perrucchee in ogni stagion.
Par. El loeug de trappel, e de gatton?
Bar. Ciamel a quii che sta in preson.
Par. El loeug de debet, e de tenciura?
Bar. A chi viv de gabol, e d’impostura.
Par. Con tutt quest bisogna di
Che sii anc vu in tocc compagn de mi.
Con tutta la scienza di vost sogn
Sii piena de strasc, e de bisogn.
E mi con tutt el me studià
Nei di del lott da degiunà
Fa la menestra senza saa,
Con sol la pell del ciervellaa,
D’andà a toeu’l pan fin de rosgieu
Ne scoeud la fam ai me fioeu
E i centesem tegni arrent
N’hoo poduu mai veng nient,
Bar. L’è perchè i vost sogn in bus
Se gh’avii’l coo come i gambus;
L’è perchè quand hii de giugà
A tutt i donnett vorrii d’atrà;
E insci suzzed che ogni strazion
Vu giughee i matt, e lasse i bon.
I sogn pu bon vel disi a vù
In quii della mezza nott in su
Ma i mei de tutt pù bon ancora
Hin quii che se fa vers l’aurora,
E i sogn de foeug, lader, e mort
Hin quii pu bon, sicur e fort.
Par. Per divela chi foeura di dent
Nei di de lott dormi nient
Giacche per fav la confidenza
Gh’hoo semper el venter in astinenza.
Bar. Se vorrii chi on me consej
Mangee ben, e bevii mej
Par. Vu parlee ben; ma no pensee
Che no poss fall senza danee.
Bar. Se vend i socch, camis, la vesta,
E anc la scuffia della festa.
Par. Se in grazia del lott hoo già impegnaa
Fina la bussera della saa?
CHIUSA
Adess capissi ch’hin bamban
E i sogn del lott in tutt ingan;
E con sti ball, e con sti sogn
Chi giuga appont per el besogn
Mi hoo semper osservaa
Che perden per la nezzessitaa.
FENIDA
